BilbaoArtek, Bilboko Udaleko Ekoizpen Artistikorako Zentroak, erakusketari eskainitako liburua aurkezten du, Amaia Gracia Azquetak egindako azken ekoizpena. BilbaoArte Fundazioaren URIBITARTE40 Aretoan ekainaren 1era arte zabalik egongo den erakusketan jasotako lanei buruzko monografia da.

Liburuaren aurkezpena maiatzaren 22an egingo da, 19:00etatik aurrera, eta bertan Amaia Gracia Azqueta eta Juan Pablo Huércanos Jorge Oteiza Museo Fundazioko zuzendariorde eta arte komisarioak hartuko dute parte. Topaketan zehar artista nafarrak Huercanosekin hitz egingo du eta proiektu honetan garatutako lan ildo batzuk azalduko dituzte.

Monografiaren diseinua Gorka Eizagirrek egin du, eta esperientzia handia du arte garaikideko erakusketa, liburu eta argitalpenen diseinuan. Erika Barahona Ede, artista eta Guggenheim Bilbao Museoko Argazki Saileko koordinatzailea, liburuaren argazkien egilea da. Era berean, Juan Pablo Huércanos Oteiza Museoko zuzendariorde eta komisario artistikoak hainbat ekarpen teoriko egin ditu argitalpenerako. La Tramak ekoitzi eta inprimatutako liburuan, Huercanosek sakon aztertzen du Amaia Gracia Azquetaren praktika artistikoa, historiografia garaikidean bere proposamenak etorkizunean grabatzeko eta aztarna uzteko ahaleginean.

Monografia doan egongo da eskuragarri URIBITARTE40 aretoan maiatzaren 22tik aurrera.

“OKUPAZIO HEDAKOR BAT” ERAKUSKETA

«Okupazio hedakor bat» erakusketa Amaia Gracia Azquetak egindako azken ekoizpena da, 2023-24an BilbaoArtek estudio lagapena jaso zuen bekaren esparruan, eta ondoren Otxarkoaga Opengelaren estudioetan egin zuen egonaldiari esker egindakoa.

Eskultura klasikoaren, barrokoaren eta errenazimentuaren proposamenetatik abiatuta erabilitako eta emulatutako materialen plastikotasunaren eta eskulturaren inguruan egindako ikerketaren emaitza dira lanak. «Okupazio hedakor bat» artistaren aurreko lan-ildoekin lotzen da, eta parametro berrietarantz eboluzionatzen du. Gracia Azquetak gizarte garaikidearen egitura falta planteatzen du, eta plastikoa material likido gisa erabiltzea, denborazkotasuna eta erresistentzia sinbolikoki tratatzeko

Piezek kokapen espezifikoko instalazio gisa funtzionatzen dute, eta forma askotarikoak dira, mugikorrarekin egindako eta etxeko argazki-formatuan inprimatutako argazki txikietatik instalazio handietara, hala nola Miriam Ocariz artista eta diseinatzailearekin elkarlanean egindakoa, non arte garaikidea eta moda uztartzen dituen, eskultura klasikoan irudikatutako arropen propietate plastikoetan sakonduz, edo polibinilozko azetatoz, beira-zuntzez eta burdinazko egiturez egindako pieza esperimentalagoen multzo bat.

Amaia Gracia Azqueta Bilbon bizi eta lan egiten duen sortzaile nafarra da. Artista bisuala da, bere lana autobiografikotik jorratzen duena. Bere prozesu eskultoriko nagusiak irudien ekoizpenarekin osatzen dira, eta gaur egun denbora, erresistentzia, abiadura, iraunkortasun eta arte garaikidearen logikaren nozioei buruz ikertzen du. 2011n eta 2023-24an BilbaoArten artista egoilarra izan da.

Informazio gehiago esteka honetan.